អ្នកជំនាញថា និស្សិត IT កម្ពុជាខ្វះជំនាញទន់
បញ្ចប់ការសិក្សាជំនាញព័ត៌មានវិទ្យា (IT) តែមួយមុខ មិនឆ្លុះបញ្ចាំងពីភាពជោគជ័យរបស់និស្សិតជំនាញបច្ចេកវិទ្យាព័ត៌មានវិទ្យានោះឡើយ។ នៅឯកម្មវិធីបារខែម (barcamp) ក្រោមប្រធានបទ «ត្រៀមខ្លួនសម្រាប់សមាហរណកម្មអាស៊ាន» ដែលរៀបចំឡើងនៅវិទ្យាស្ថានបច្ចេកវិទ្យាកម្ពុជាកាលពីចុងសប្ដាហ៍កន្លងមក អ្នកជំនាញមកពីបណ្ដាក្រុមហ៊ុនឯកជន និងអង្គការមួយចំនួន ដែលធ្វើការពាក់ព័ន្ធនឹងវិស័យព័ត៌មានវិទ្យា បានណែនាំនិស្សិតជំនាញ IT ឲ្យសិក្សាជំនាញដទៃទៀត ដើម្បីសម្រេចបានជោគជ័យនៅក្នុងជីវិត។លោក ស គីណាល់ នាយកគ្រប់គ្រងទូទៅនៃក្រុមហ៊ុន Aplus Consulting បានឲ្យដឹងថា អ្នកសិក្សាព័ត៌មានវិទ្យាភាគច្រើន កំពុងប្រឈមនឹងបញ្ហាមួយ គឺកង្វះខាតជំនាញទន់។ លោក គីណាល់ និយាយថា៖ «អ្នកសិក្សាផ្នែកព័ត៌មានវិទ្យា មានតែជំនាញរឹង ខ្វះជំនាញទន់ ប្រៀបដូចមនុស្សយន្តអីចឹង»។ ដោយសង្កត់ធ្ងន់ទៅលើការប្រាស្រ័យទាក់ទង នាយកគ្រប់គ្រងរូបនេះ ចាត់ទុកជំនាញទន់ គឺជាកត្តាសំខាន់ដើម្បីឈានទៅភាពជោគជ័យនៅក្នុងវិជ្ជាជីវៈព័ត៌មានវិទ្យា។
ស្របពេលជាមួយគ្នានោះដែរ លោក រុន សារឹម ប្រធានផ្នែកទំនាក់ទំនង និងស្វែងរកជំនួយ នៃអង្គការ Passerelles Numerci Cambodia (PNC) បានចាត់ទុកស្វ័យសិក្សាគឺជាគន្លឹះសំខាន់សម្រាប់ទទួលបានភាគជោគជ័យទាំងការសិក្សា និងការងារ។ ដោយបានណែនាំឲ្យយុវជនកម្ពុជាចេះជ្រើសរើសបុគ្គលល្បីៗធ្វើជាគំរូ លោកនិយាយថា៖ «ការរៀនសូត្រដោយខ្លួនឯង អាចឲ្យយើងស្វែងយល់ពីមជ្ឈដ្ឋានជុំវិញ និងអាចទទួលបានអ្វីថ្មីៗពីអ្នកនៅជុំវិញខ្លួនទាំងនៅសាលារៀន និងការងារ»។
0 comments:
Post a Comment